مولانا سید محمد اسماعیل کٹکیؒ: حیات و خدمات
محمد روح الامین میُوربھنجی
مناظرِ اسلام مولانا سید محمد اسماعیل کٹکی رحمۃ اللہ علیہ سر زمین اڈیشا (اڑیسہ) کی وہ شخصیت تھی، جن کے اہل اڈیشا پر دینی و ایمانی احسانات ہیں، جنھوں نے اڈیشا سے فتنۂ قادیانیت کی جڑیں اکھیڑ کر رکھ دیں؛ یہاں تک کہ برطانیہ میں بیٹھے مرزائے کاذب کے جانشینوں کو بھی حواس باختہ کر کے رکھ دیا، آپ صوبہ اڑیسہ (موجودہ نام: اڈیشا) کے اولین فضلائے دار العلوم دیوبند میں سے تھے۔
ان پر باقاعدہ کوئی کتاب نہیں آئی ہے۔ مختلف تحریریں؛ مختلف کتابوں یا رسالوں میں شائع ہوئیں، جن تک رسائی بڑی تحقیق و تلاش کے بعد ہوئی۔ ان کی وفات پر مولانا نور عالم خلیل امینیؒ نے مجلہ الداعی کے ربیع الاول–ربیع الثانی 1426ھ (بہ مطابق اپریل–مئی 2005ء) کے شمارے میں سوانحی مقالہ لکھا تھا۔ مرکزی دفتر کل ہند مجلس تحفظ ختم نبوت، دار العلوم دیوبند سے شائع شدہ مولانا مرحوم کے مجموعۂ مضامین ”ذرا غور کریں“ کے 2005ء اور 2012ء کے دو الگ الگ ایڈیشنوں میں، قاری سید محمد عثمان منصور پوریؒ کی طرف منسوب بہ طور حالات مصنف؛ مولانا مرحوم پر الگ الگ پیرایے میں دو مضامین موجود ہیں۔ عالمی مجلس تحفظ ختم نبوت، ملتان، پاکستان سے شائع ہونے والی کتاب ”احتساب قادیانیت“ کی چالیسویں جلد میں مولانا مرحوم کی تین کتابیں شائع کرنے کے ساتھ ساتھ مشہور پاکستانی عالم مولانا اللّٰہ وسایا صاحب نے مولانا مرحوم کا کچھ سوانحی خاکہ پیش کرتے ہوئے، اپنے بعض مشاہدات بھی پیش کیے ہیں۔ مولانا سید علی اشرف کٹکی قاسمی، استاذ جامعہ مرکز العلوم سونگڑہ، کٹک نے اپنے دار العلوم دیوبند کے زمانۂ طالب علمی میں مولانا مرحوم سے انٹرویو لیا تھا، جو آئینۂ دار العلوم کے 28 صفر 1417ھ مطابق 15 جولائی 1996ء کے شمارے میں شائع ہوا تھا۔ مفتی سید محمد سلمان منصورپوری کی ندائے شاہی میں شائع ایک تحریر؛ اُنھیں کے مجموعۂ مضامین ”ذکر رفتگاں“ جلد دوم میں بھی چَھپی ہے۔
یکم رمضان 1412ھ بہ مطابق 6 مارچ 1992ء کو اخبار الجمعیۃ، دہلی میں مولانا مرحوم پر معروف صحافی عادل صدیقی (متوفی: 2021ء) کا مضمون شائع ہوا تھا۔ اسی طرح 2009ء میں ہفت روزہ الجمعیۃ میں سلسلہ وار تین قسطوں میں اڈیشا کے معروف صاحب قلم اور سخن گو عالم دین مولانا مطیع اللہ نازش کٹکی کے تفصیلی مضامین شائع ہوئے تھے، نیز انھیں کا ایک مضمون 2007ء کو اڈیشا کی جانب سے شائع کردہ چھٹی جماعت میں داخل نصاب کتاب ”دلکش اردو “ میں شائع ہوا تھا۔ اسی طرح انھیں کی کتاب ”اڈیشا کے مجاہدین آزادی“ میں بھی مولانا مرحوم پر مضمون موجود ہے۔ اِن کے علاوہ بھی مختلف تحریروں تک رسائی ہوئی یا ان کے بارے میں علم ہوا؛ ان مختلف جگہوں پر بکھری ہوئی باتوں کو یکجا کرتے ہوئے اور مزید تحقیق کے ساتھ بندہ مولانا مرحوم پر کچھ لکھنے کی سعادت حاصل کر رہا ہے۔
ولادت
مولانا مرحوم 6 جنوری سنہ 1914ء کو رسول پور، سونگڑہ، ضلع کٹک، صوبہ بہار اڑیسہ میں پیدا ہوئے تھے۔ (آئینہ دار العلوم، 28 صفر 1417ھ مطابق 15 جولائی 1996ء؛ اڈیشا کے مجاہدین آزادی، ص: 263) ”تحفظ ختم نبوت کی صد سالہ تاریخ“ مصنَّفہ: مولانا مشتاق احمد چینوٹیؒ، مطبوعہ: 2008ء میں مولانا سید عطاء اللہ شاہ بخاریؒ اور مولانا سید محمد اسماعیل کٹکیؒ کا ننھیال ایک لکھا ہوا ہے۔
تعلیم و تربیت
انھوں نے اردو، فارسی اور ابتدائی دیگر کتابیں اپنے وطن مالوف میں اپنی پھوپھی سیدن بی بی (سیدہ خاتونؒ) سے پڑھیں۔ ہدایۃ النحو تک کی تعلیم؛ مدرسہ شاہی کے ایک فاضل مولانا محمد عمر کٹکیؒ کے قائم کردہ مدرسہ؛ ”مدرسہ اسلامیہ، سونگڑہ“ میں حاصل کی، پھر آگے کی تعلیم کے لیے آپ مدرسہ قاسمیہ شاہی مرادآباد پہنچے اور وہاں شرح وقایہ تک کی تعلیم حاصل کی، جہاں پر ان کے اساتذہ میں مؤرخ اسلام مولانا سید محمد میاں دیوبندیؒ، مولانا محمد اسماعیل سنبھلیؒ، مولانا عبد الحق مدنیؒ اور مولانا قدرت اللّٰہ قدرتؒ شامل تھے۔ (ذکر رفتگاں، ج: 2، ص: 16–17)
مرادآباد کے بعد آپ نے دار العلوم دیوبند کا رخ کیا، جہاں پر آپ نے اس وقت کے جبالِ علم اور متبحر اساتذہ سے تحصیل علم کے منازل طے کیے، جن میں شیخ الاسلام مولانا سید حسین احمد مدنیؒ، علامہ محمد ابرہیم بلیاویؒ، حکیم الاسلام مولانا قاری محمد طیب قاسمیؒ، مولانا رسول خان ہزارویؒ، مفتی محمد شفیع دیوبندیؒ، مولانا میاں سید اصغر حسین دیوبندیؒ، شیخ الادب و الفقہ مولانا اعزاز علی امروہویؒ، مولانا مرتضی حسن چاندپوریؒ، مولانا عبد السمیع دیوبندیؒ اور مولانا نبیہ حسن دیوبندیؒ شامل ہیں۔ (قاری محمد عثمان منصور پوریؒ و مولانا نور عالم خلیل امینیؒ کی تحریروں کے مطابق)
فراغت
سنہ 1353ھ مطابق سنہ 1934ء میں آپ نے دار العلوم دیوبند سے درس نظامی کی تکمیل کی۔ (محافظ خانہ دار العلوم دیوبند سے حاصل کردہ ریکارڈ کے مطابق؛ مولانا مرحوم کا سنہ فراغت 1353ھ ہے، جس کا مطابق سنہ عیسوی 1934 نکل کر آتا ہے؛ جب کہ خود مولانا نے اپنے انٹرویو میں اپنا سنہ فراغت 1932ء بتلایا ہے، اس سلسلے میں بندے نے دار العلوم دیوبند کی ریکارڈ کو ترجیح دی ہے)۔
محافظ خانہ دار العلوم دیوبند سے حاصل کردہ ریکارڈ کے مطابق انھوں نے ”صحیح بخاری“ و ”جامع ترمذی“ شیخ الاسلام مولانا مدنیؒ سے، ”صحیح مسلم“ و ”شرح معانی الآثار“ علامہ محمد ابراہیم بلیاویؒ سے، ”سنن نسائی“ اور ”شمائل ترمذی“ شیخ الادب و الفقہ مولانا محمد اعزاز علی امروہویؒ سے پڑھیں، بقیہ کتابوں کی ریکارڈ حاصل نہ ہو سکی۔
میدان مناظرہ میں
دار العلوم دیوبند کے زمانۂ طالب علمی میں آپ نے مولانا سید مرتضی حسن چاندپوریؒ کے پاس مناظرہ کی مشق و تمرین کی اور زمانۂ طالب علمی ہی میں آپ ایک کامیاب مناظر بن چکے تھے اور اسی زمانہ میں کالی چرن اور رام چندر جیسے آریہ سماج پنڈتوں کو لاجواب اور مبہوت کیا تھا اور دیوبند شوگر میل کے ایک رافضی مینیجر کو بحث و مناظرہ کے ذریعے؛ دولت اسلام سے مالا مال کیا تھا، جس نے مناظرہ کے بعد قاری محمد طیب قاسمیؒ کے دست مبارک پر اسلام قبول کر لیا تھا۔ قادیانیوں کے مشہور مناظرین مفتی صادق، سرور شاہ، محمد حنیف کشمیری، غلام احمد مجاہد، محمد سلیم، مولوی غلام رسول راجکی، مولوی ظہور الحسن اور مولوی امینی وغیرہ سے مناظروں میں آپ نے نمایاں کامیابی حاصل کی۔ (ذرا غور کریں، بار اول: 2005ء، بار دوم: 2012ء؛ شبستان، اکتوبر 1974ء)
اردو ڈائجسٹ ”شبستان“ کے اکتوبر 1974ء کے شمارے میں شائع مولانا مرحوم کی ایک تحریر کے مطابق، زمانۂ طالب علمی سے انھیں رد قادیانیت سے خاص دلچسپی تھی، اس کے لیے تمرین اور عملی مشق ان کا محبوب مشغلہ تھا۔ زمانۂ طالب علمی ہی سے انھیں ملک میں ہونے والے مناظروں میں شرکت کے مواقع بھی ملتے رہے، سب سے پہلا مناظرہ، جس میں انھیں شرکت کا موقع ملا تھا، وہ مولانا ثناء اللہ امرتسریؒ کے زیر صدارت منعقد ہونے والا پِنڈی بہاؤ الدین (ضلع مَنڈی بہاؤ الدین، پنجاب، پاکستان) کا مناظرہ تھا، جس وقت مولانا مرحوم کی عمر محض پندرہ سال کی تھی اور انھیں کم عمر ہونے کی وجہ سے فریق مخالف کی طرف سے چپ کرکے دبانے کی کوشش بھی کی جا رہی تھی؛ مگر وہ مرعوب نہ ہوئے؛ بلکہ انھوں نے بے باکانہ اپنی بات قوی اور مدلل انداز میں رکھی۔
میدان عمل میں
مولانا مرحوم، شیخ الاسلام مولانا مدنیؒ کے خاص تلامذہ میں تھے، تعلیم سے فراغت کے بعد آپ اولاً راونشا کالجیٹ اسکول، کٹک میں سیکنڈ مولوی کی حیثیت سے فارسی و اردو کے استاذ مقرر ہوئے۔ پھر جے پور ہائی اسکول، کوراپٹ، اڈیشا میں 1947ء تک اسکول کی سرکاری ملازمت میں مشغول رہے۔(صریرِ خامہ از خاور نقیب، ص: 2008ء) بہ قول مولانا سید عبد الحفیظ کٹکی مد ظلہ، 1946ء میں مولانا مرحوم، اسکول سے ایک سال کی رخصت لے کر انجمن تبلیغ الاسلام کے کاموں میں مصروف رہے اور اگلے سال تک سرکاری طور پر اسکول کے مدرس ہی رہے (یہ اس اشکال کا جواب ہے کہ مولانا مرحوم 1946ء میں انجمن تبلیغ الاسلام سے منسلک ہوئے تھے تو آئینہ دار العلوم میں شائع خود ان کے انٹرویو میں یہ بات کیسے موجود ہے کہ 1947ء تک ان کی اسکولی زندگی رہی)۔
29 دسمبر 1946ء میں آپ حضرت شیخ الاسلام کے ایما پر انجمن تبلیغ الاسلام (جس کا قیام؛ 1945ء میں سونگڑہ کے اہلِ فکر حضرات کے ذریعے عمل میں آیا تھا) سے منسلک ہوکر بہ حیثیت مبلغ؛ رد قادیانیت اور تحفظ ختم نبوت کے لیے سرگرم عمل ہوگئے تھے۔ زمانۂ طالب سے لے کر نوے کی دہائی تک آپ نے تقریباً 75 تحریری و تقریری مناظرے کیے، جن میں سے باقاعدہ 20–25 بڑے مناظرے ہوئے۔ آٹھ سو سے زائد افراد آپ کے ہاتھ پر مشرف با اسلام ہوئے اور آپ کی وعظ و تقریر اور اظہارِ حق و ابطالِ باطل سے لاتعداد مسلمانوں کا ایمان؛ مضبوط و مستحکم ہوا۔ (مولانا قاری محمد عثمان منصور پوریؒ کی تحریر کے مطابق)
ماہنامہ شبستان کے اکتوبر 1974ء کے شمارے میں شائع مولانا مرحوم کی تحریر (جو ”میں نے آٹھ ہزار قادیانیوں کو مسلمان کیا “ کے عنوان کے ساتھ شائع کیا تھا) کے مطابق؛ جب ”مناظرۂ بھدرک“ اور ”یادگار یادگیر“ کے نام سے بھدرک اور یادگیر کے مناظروں کی رپورٹیں مجمع عام میں سنائی گئیں، تو بے شمار قادیانیوں نے قادیانیت سے توبہ کی اور مسلمان ہو گئے، جن کی تعداد آٹھ ہزار تھی۔
آپ نے کئی مناظرے کیے، جن میں سے بعض مناظروں کا ذکر درج ذیل ہے:
(1) سات بٹیہ، ضلع کٹک میں ہونے والا مناظرہ (مولانا محمد علی کٹکی صاحب کے بیان کے مطابق)۔
(2) مناظرۂ یادگیر؛ جو نومبر 1963ء کو؛ یادگیر، کرناٹک میں قادیانیوں سے ہوا تھا، معاونین میں مولانا سید احمد النبیؒ اور مولانا سید سراج الساجدین کٹکیؒ بھی شامل تھے، اس مناظرے کی رپورٹ ”یادگارِ یادگیر“ کے نام سے شائع بھی ہوئی تھی اور جنوری 2012ء میں عالمی مجلس تحفظ ختم نبوت، ملتان، پاکستان سے شائع ہونے والی کتاب ”احتساب قادیانیت“ کی چالیسویں جلد میں مولانا موصوف کی یہ کتاب مزید دو کتابوں کے ساتھ شائع کی گئی ہے، جو اب انٹرنیٹ پر بھی دستیاب ہے۔
(3) ایک مناظرہ غالباً 1988ء میں کُتّہ گوڑم (کوتھاگودیم) تلنگانہ میں ہوا تھا۔ (مولانا محمد علی کٹکی کے بیان کے مطابق)۔
(4) 1958ء کو بھدرک، اڈیشا میں ہونے والا مناظرہ بھی یادگار مناظرہ تھا، جس میں مشہور بریلوی عالم مولانا حبیب الرحمن دھام نگری کی دعوت پر اہل سنت و الجماعت کی طرف سے بہ حیثیت مناظر، مولانا مرحوم تشریف لے گئے تھے، حضرت مولانا احمد النبیؒ بھی ہمراہ تھے۔ فریق مخالف کی طرف سے مولانا شریف احمد امینی تھے، جس میں قادیانیوں کو شکست فاش ہوئی تھی۔ آپ کے ساتھ مناظروں میں کبھی کبھی مولانا احمد النبی بھی ہوا کرتے تھے۔ (مولانا مرحوم کی ایک آڈیو تقریر، جو یوٹیوب پر بھی دستیاب ہے، اس کے مطابق 1944ء کو یہ مناظرہ ہوا تھا اور فریق مخالف میں قادیانی عالم غلام احمد مجاہد تھا۔ فریق مخالف کو عبرت ناک شکست ہوئی تھی، جس میں بہ بقول مولانا کٹکی، غلام احمد مجاہد بے ہوش ہو گیا تھا اور متواتر بائیس روز تک بے ہوش رہا تھا۔)
(5) 15 اکتوبر 1992ء کو خامنی، متھرا میں ہونے والا مناظرہ، جس میں مولانا عبد العلیم فاروقی، مفتی محمود حسن بلند شہری اور مولانا شاہ عالم گورکھپوری وغیرہم شریک تھے۔ (کل ہند مجلس تحفظ ختم نبوت، دار العلوم دیوبند کی پچیس سالہ خدمات: مختصر رپورٹ (1986—2011ء)، محمد عثمان منصور پوریؒ، ص: 68)
رد بریلویت پر آپ کی خدمات
آپ نے اڈیشا میں رد بریلویت پر بھی کام کیا؛ بالخصوص آپ نے اپنے تلامذہ مولانا سید سراج الساجدین کٹکیؒ، مولانا محمد جلال الدین صاحب کٹکیؒ، مولانا امین الدین صاحب میُوربھنجیؒ (دوندو شریف والے)، مولانا اختر بیگ قاسمیؒ، مولانا محمد علی کٹکی وغیرہم سے اس سلسلے میں کام لیا۔
اس سلسلہ میں کئی مناظرے ہوئے، جن میں بارہ بٹی اسٹڈیم، کٹک میں ہونے والا مناظرہ 1399ھ بہ مطابق 1979ء کو ہوا تھا (مولانا محمد علی کٹکی کے بیان کے مطابق)، اہل حق کی طرف سے صدر مناظرہ مولانا ارشاد احمد فیض آبادی (متوفی: 1989ء)، مبلغ دار العلوم دیوبند تھے؛ جب کہ فریق مخالف کی طرف سے صدر مولانا حبیب الرحمن دھام نگری (معروف بہ مجاہد ملت؛ متوفی: 1981ء) تھے اور ان کی طرف سے مشہور زمانہ بریلوی عالم مولانا ارشد القادری (متوفی: 2002ء) بھی مدعو اور شریکِ مناظرہ تھے، جس میں فریق مخالف کو بری طرح شکست بھی ہوئی تھی۔
سیاسی پارٹی اور تحریک آزادی
وہ کانگریس کے حامی تھے اور اخیر عمر تک اسی سے منسلک رہے اور تحریک آزادی میں بھی سرگرم رہے۔ مولانا سید علی اشرف قاسمی صاحب کو انٹرویو دیتے ہوئے مولانا مرحوم نے فرمایا تھا: ”میرا تعلق شروع سے لے کر اب تک کانگریس سے رہا ہے اور کانگریس ہی سے رہے گا، میں نے تا زندگی کھدر پہنا اور پہنتا رہوں گا۔ میں کانگریس کی ہزار خرابیوں کے باوجود؛ (اسے) دوسری پارٹیوں سے بہتر اور اچھا سمجھتا ہوں۔ سنہ 1947ء تک تو میری اسکولی زندگی رہی (آپ اس وقت اسکول ٹیچر تھے)، جنگ آزادی کے لیے انڈر گراؤنڈ کام کرتا رہا، اکثر خفیہ امور مجھ سے متعلق رہے اور میں بڑی احتیاط سے اسے انجام دیتا رہا، جس کی وجہ سے ہمیشہ گرفتاری سے محفوظ رہا۔“ ( آئینۂ دار العلوم دیوبند، شمارہ: 28 صفر 1417ھ بہ مطابق 15 جولائی 1996ء)
جامعہ اسلامیہ مرکز العلوم کا قیام
جامعہ اسلامیہ مرکز العلوم سونگڑہ کی مجلسِ شوریٰ (منعقدہ: یکم محرم الحرام 1444ھ مطابق 31 جولائی 2022ء) میں پیش کی گئی ”آئینِ جامعہ اسلامیہ مرکز العلوم سونگڑہ “ کے مطابق؛ مدرسے کی ابتدا دراصل ایک مکتب کی شکل میں ہوئی تھی، پھر 1945ء میں جب ”انجمن تبلیغ اسلام“ کا قیام عمل میں آیا، تو وہ مکتب انجمن کے زیر نگرانی آ گیا، اور انجمن نے اس مکتب کو عربی مدرسے میں تبدیل کرکے اس کا نام ”مدرسہ عربیہ اسلامیہ سونگڑہ“ رکھا۔ پھر 29 دسمبر 1946ء کو مولانا مرحوم انجمن کے مبلغ اور اس مدرسے کے صدر مدرس منتخب کیے گئے اور 7 مئی 1951ء کو انجمن کی جانب سے مولانا مرحوم کو مستقل مہتمم مقرر کیا گیا۔
1987ء میں امارت کانفرنس کے موقع پر مولانا سید سراج الساجدین کٹکیؒ نے ”مدرسہ عربیہ اسلامیہ سونگڑہ“ سے منتقل کرکے مدرسے کا نام؛ ”مرکز العلوم مدرسہ عربیہ اسلامیہ سونگڑہ“ کر دیا، پھر انھیں کے ہی دور میں ”الجامعۃ الاسلامیۃ مرکز العلوم سونگڑہ“ نام ہوا اور اب یہ ادارہ ”جامعہ اسلامیہ مرکز العلوم سونگڑہ“ کے نام سے رجسٹرڈ ہے۔ (آئینِ جامعہ اسلامیہ مرکز العلوم سونگڑہ)
روز اول سے ہی شیخ الاسلام مولانا سید حسین احمد مدنیؒ اس مدرسے کے سرپرست رہے، پھر فدائے ملت مولانا سید اسعد مدنیؒ تا وفات اس کے سرپرست رہے اور موجودہ سرپرست جانشین شیخ الاسلام مولانا سید ارشد مدنی مد ظلہ ہیں۔
جمعیۃ علماء اڑیسہ کی صدارت
صوبہ اڑیسہ بہت پہلے ہی سے حدود کے اختلاف کے ساتھ مستقل صوبہ رہا ہے، سنہ 1803ء میں اسے متحدہ بنگال میں شامل کر لیا گیا تھا، اس سے قبل ہی بہار بھی متحدہ بنگال میں شامل کیا جا چکا تھا، پھر سنہ 1912ء میں انگریزوں نے ہی صوبجات بہار و اڑیسہ کو الگ کر کے ایک مستقل صوبہ بنا دیا، اس کے بعد یکم اپریل 1936ء میں انگریزوں ہی کے ذریعے؛ صوبہ اڑیسہ کو لسانی بنیاد پر صوبہ بہار سے الگ کرکے مستقل ریاست بنا دیا گیا۔ (Some Aspects of British Administration in Orissa [1912–1936]، بَندیتا دیوی، سنہ اشاعت: 1992ء، صفحہ: 14–15) دونوں صوبوں کے سارے سرکاری دفاتر الگ الگ ہوگئے تھے، اسی کے پیش نظر 1932ء میں (بہ قول: مولانا سید عبد الحفیظ کٹکی) یا 25 دسمبر 2021ء کو جمعیت علمائے اڈیشا (الف) کی مجلس عاملہ میں پیش کی گئی سکریٹری رپورٹ اکتوبر یا نومبر 1936ء میں اور بہ قول: مولانا سید سراج الساجدین کٹکیؒ؛ 1938ء میں اڑیسہ کی ایک مستقل ریاستی جمعیت قائم ہوئی، جس کا صدر مولانا سید فضل الرحمن قاسمی سونگڑویؒ، ایڈیٹر مسلم گزٹ، کٹک کو اور مولانا سید برکت اللہ برکت (متوفی: 1979ء) کو نائب صدر منتخب کیا گیا، پھر مولانا سید فضل الرحمان صاحب کے انتقال کے بعد مولانا سید برکت اللہ صاحب کو صدر مقرر کیا گیا، پھر ان کی زندگی ہی میں مولانا محمد اسماعیل کٹکی کو صدر مقرر کیا گیا (سیکریٹری رپورٹ بہ موقع اجلاس منتظمہ جمعیت علمائے اڈیشا، مورخہ 20 جمادی الاولی 1443ھ مطابق 25 دسمبر 2021ء، از مفتی سید نقیب الامین صاحب برقی قاسمی) مولانا سید اسماعیل کٹکیؒ کس سنہ میں جمعیۃ علماء اڑیسہ کے صدر بنائے گئے تھے، اس کی تحقیق تادم تحریر نہ ہو سکی؛ البتہ 1964ء سے قبل ہی یقینی طور پر آپ صدر بنائے جا چکے تھے؛ جیسا کئی قرائن سے معلوم ہوا، وقف ایڈمنسٹریٹشن بورڈ کے 1965–66ء کے شائع کیے گئے تجزیاتی رپورٹ میں مولانا مرحوم کو جمعیۃ علماء اڑیسہ کا صدر لکھا گیا ہے۔
نوٹ:- آغاز جمعیۃ علماء اڑیسہ کے سلسلے میں اختلاف اقوال کی تطبیق یوں ممکن ہے کہ 1932ء میں جمعیت علماء کی تحریک اڑیسہ میں پہنچی ہو، 1936ء کے اواخر میں صوبہ بہار سے صوبہ اڑیسہ کی علیحدگی کے بعد صوبائی جمعیۃ بنانے کی تحریک شروع ہوئی ہو؛ جیساکہ مسلم گزٹ، کٹک میں 1936ء کے آس پاس جمعیۃ علماء اڑیسہ کی خبروں کی اشاعت سے اس کی تائید ہوتی ہے اور چوں کہ 1938ء میں مرکزی جمعیۃ علماء کی طرف سے شیخ الاسلام مولانا سید حسین احمد مدنیؒ، مجاہد ملت مولانا حفظ الرحمن سیوہارویؒ، سحبان الہند مولانا سعید احمد دہلویؒ اور مؤرخ اسلام مولانا سید محمد میاں دیوبندیؒ وغیرہ جیسے اکابرین جمعیت علماء کی سونگڑہ، اڑیسہ میں آمد ہوئی تھی، اسی وقت سے جمعیۃ علماء اڑیسہ کے آغاز کا شبہ ہو گیا ہو، اسی اجلاس کے موقع پر مولانا مرحوم کا نکاح مسنون ہوا تھا۔ (اپنی توجیہ اور بعض باتیں، مجلس شوریٰ جامعہ رشیدیہ ریاض العلوم سونگڑہ [منعقدہ: 8 جمادی الاولی 1425ھ مطابق 27 جون 2004ء] کے موقع پر، مولانا سید عبد الحفیظ کٹکی مد ظلہ کے ٹیپ شدہ تقریر کے شائع شدہ رسالے سے مستفاد ہیں۔)
بہ حیثیت امیر شریعت اڑیسہ
سنہ 1964ء میں مولانا مرحوم کو امارت شرعیہ اڑیسہ کا امیر مقرر کیا گیا تھا، پھر اس کے بعد امیر الہند اول (امارت شرعیہ ہند کے امیر اول) حضرت مولانا حبیب الرحمن صاحب محدث اعظمیؒ 1988ء میں امارت شرعیہ ہند کے قیام کے بعد؛ امارت شرعیہ ہند کی طرف سے اڈیشا کے دورے پر تشریف لائے تھے اور انھوں نے مولانا مرحوم کی امارت کی توثیق بھی کی تھی اور اس کی بقا کا اعلان بھی کیا تھا۔ (مولانا سید سراج الساجدین کٹکیؒ کے بیان کے مطابق) 1964ء سے تا وفات یعنی 2005ء تک آپ امیر شریعت اڑیسہ رہے اور سالہا سال جمعیت علمائے ہند کی مجلس عاملہ کے رکن بھی رہے، اور آپ کی وفات تک آپ کے شاگرد رشید مولانا سید سراج الساجدین کٹکیؒ نائب امیرِ شریعت و نائب صدر جمعیت اڈیشا رہے، پھر اپنے استاذِ محترم کی وفات کے بعد صدر جمعیۃ علماء اڑیسہ اور امیر شریعت اڑیسہ بنائے گئے۔
کل ہند مجلس تحفظ ختم نبوت دار العلوم دیوبند کے لیے آپ کی خدمات
سنہ 1984ء میں جب جنرل ضیاء الحق شہید نے امتناع قادیانیت آرڈیننس جاری کیا، جس کے نتیجہ میں مرزا طاہر بھاگ کر برطانیہ میں پناہ گُزیں ہوا اور قادیانیوں نے دوبارہ اپنی سرگرمیوں کا رخ ہندوستان کی طرف پھیر لیا تو اس وقت فدائے ملت مولانا سید اسعد مدنیؒ نے مسلمانوں میں اس سلسلے میں بیداری اور معاملہ کی گہرائی کا احساس پیدا کرنے کے لیے 29 تا 30 اکتوبر 1986ء کو دار العلوم دیوبند میں ایک سہ روزہ اجلاس منعقد کروایا، اسی اجلاس کے موقع پر دار العلوم دیوبند کے سایے تلے ”کل ہند مجلس تحفظ ختم نبوت“ کا قیام عمل میں آیا، جس کا صدر؛ مہتمم دار العلوم دیوبند مولانا مرغوب الرحمن بجنوریؒ، نائب صدر مولانا سید محمد اسماعیل کٹکیؒ، ناظم اعلی؛ مفتی سعید احمد پالن پوریؒ اور ناظم؛ قاری سید محمد عثمان منصور پوریؒ کو بنایا گیا تھا، ملک بھر کی مؤقر شخصیات پر مشتمل 23 حضرات کی مجلسِ عاملہ تشکیل دی گئی تھی۔ اس کے بعد فتنۂ قادیانیت کی سرکوبی کی تربیت و ٹریننگ کے لیے سنہ 1988ء میں جو سب سے پہلا دس روزہ تربیتی کیمپ دار العلوم دیوبند میں منعقد ہوا تھا، اس کا انعقاد مولانا مرحوم کے زیر سرپرستی ہوا تھا۔ اس کے بعد بھی کل ہند مجلس تحفظ ختم نبوت کے زیر نگرانی ملک بھر میں رد قادیانیت پر تربیتی کیمپ اور کانفرنسیں منعقد ہوئیں تو بہت سے مقامات پر مولانا مرحوم نے شرکت فرما کر طلبہ و علماء اور شرکاء کو رد قادیانیت کے خاص گر سکھائے۔ اسی طرح سنہ 1992ء تا وفات آپ تقریباً چودہ سال مجلس شورٰی دار العلوم دیوبند کے رکن رہے۔ (دار العلوم دیوبند کی جامع و مختصر تاریخ از ڈاکٹر مفتی محمد اللّٰہ خلیلی قاسمی، ایڈیشن: اکتوبر 2020ء، مطبوعہ: شیخ الہند اکیڈمی، دار العلوم دیوبند، صفحہ: 322 ،323 ،758؛ کتاب ”ذرا غور کریں“ [دوسرا ایڈیشن: 2012ء] میں شائع بہ طور عرضِ ناشر، قاری سید محمد عثمان منصور پوریؒ کی تحریر)
دیگر مناصب یا اعزازات
وہ رابطۂ مدارس اسلامیہ عربیہ دار العلوم دیوبند کی طرف سے اڈیشا شاخ کے صوبائی صدر بھی رہے۔ (رابطۂ مدارس اسلامیہ عربیہ دار العلوم دیوبند کی تیرہ سالہ خدمات از مولانا شوکت علی قاسمی بستوی، مئی 2007، ص: 106–107) نیز جمعیۃ علماء ہند کی مجلس عاملہ کے رکن بھی رہے ہیں۔
مشہور پاکستانی مناظرین مولانا لال حسین اخترؒ (متوفی: 1973ء) اور مولانا محمد حیاتؒ (متوفی: 1980) سے ان کے دوستانہ مراسم تھے، نیز 6 اپریل 1999ء کو مدرسہ صولتیہ، مکہ مکرمہ میں مولانا محمد طلحہ کاندھلویؒ (متوفی: 2019ء) کی مہمان نوازی کے موقع پر مولانا مرحوم نے مولانا منظور احمد چنیوٹیؒ (متوفی: 2004ء) کی مجاہدانہ خدمات سے خوش ہوکر ان کی دستار بندی فرمائی تھی۔ (تحفظ ختم نبوت کی صد سالہ تاریخ، مطبوعہ: 2008ء)
تلامذہ
آپ کے تلامذہ میں یہ حضرات بھی شامل تھے:
• مولانا سید سراج الساجدین کٹکیؒ (متوفی: 21 اکتوبر 2006ء؛ مولانا مرحوم کو اپنے تلامذہ میں سب سے زیادہ انھیں پر اعتماد تھا، جیساکہ مولانا سید اشرف علی کٹکی قاسمی کے لیے ہوئے انٹرویو میں مذکور ہے)، امیر شریعت ثانی اڈیشا و اور صدر جمعیۃ علماء اڈیشا رابع
• مولانا عبد الحفیظ کٹکی مظاہری، مہتمم جامعہ رشیدیہ ریاض العلوم، گوہالی پور، سونگڑہ
• مولانا محمد جلال الدین کٹکی قاسمیؒ (متوفی: 15 فروری 2021ء)، جمعیۃ علماء اڈیشا (الف) کے پہلے صدر، امارت شرعیہ اڈیشا کے تیسرے امیر اور بانی و مہتمم جامعہ اسلامیہ دینیہ (ارشد العلوم)، کنی پاڑہ، سبلنگ، کٹک
• مولانا محمد منظور احمد کٹکیؒ، سابق چیئرمین اڈیشا اردو اکادمی، بھوبنیشور، اڈیشا
• مولانا سید کفیل احمد قاسمی، سابق چیئرمین شعبۂ عربی و ڈین فیکلٹی آف آرٹس، علی گڑھ مسلم یونیورسٹی
• مولانا محمد علی صاحب کٹکی، مہتمم جامعہ سراج العلوم عرفانیہ، سات بٹیہ، کٹک و نائب صدر جمعیت علمائے اڈیشا (الف)
• مولانا عبد السبحان صاحب قاسمی نیاگڑھی، اڈیشا کے اڈیا بولے جانے والے علاقوں میں ان کی بے بہا دینی خدمات ہیں۔
• مولانا عبد الستار صاحب کاکٹ پوریؒ، سابق مہتمم مدرسہ احمد العلوم، فقیر ساہی، کاکٹ پور، پوری
• مولانا عبد المنان صاحب قاسمی، سابق رکن مجلسِ عاملہ جمعیت علمائے اڈیشا (الف)
• مولانا محمد فاروق صاحب قاسمی، امیر شریعت رابع صوبہ اڈیشا، مہتمم جامعہ اشرف العلوم کیندرا پاڑہ
• مولانا محمد سفیان صاحب قاسمی، نائب صدر جمعیت علمائے اڈیشا (الف)
• مولانا عنایت اللہ صاحب ندوی، استاذ دار العلوم ندوة العلماء لکھنو و مصنفِ ”بین الاقوامی معلومات“
• مولانا محمد غفران صاحب قاسمی، بالو بیسی، سابق عبوری صدر جمعیت علمائے اڈیشا (الف) و مہتمم مدرسہ فرقانیہ، بالوبیسی
• مولانا سید انظر نقی صاحب قاسمی، استاذ حدیث جامعہ مرکز العلوم، سونگڑہ، اڈیشا
• مولانا محمد ارشد صاحب قاسمی (راور کیلا)، جمعیت علماء اڈیشا (الف) کے دوسرے صدر
• مفتی اشرف علی صاحب قاسمی، مہتمم مدرسہ قاسم العلوم، بشن پور، ضلع جگت سنگھ پور و سابق جنرل سیکریٹری جمعیت علمائے اڈیشا (میم)
• مولانا نور اللہ صاحب قاسمی جدو پوریؒ (متوفی: 19 جولائی 2022ء)، خلیفہ فدائے ملت حضرت مولانا سید اسعد مدنیؒ
• مولانا سید شمس تبریز قاسمی، سفیر دار العلوم دیوبند
• مولانا مفتی سید نقیب الامین صاحب برقی قاسمی، مہتمم و شیخ الحدیث جامعہ مرکز العلوم، سونگڑہ، کٹک و جنرل سکریٹری جمعیۃ علماء اڈیشا (الف)
• قاری محمد نور الامین صاحب صدیقی، مہتمم دار العلوم حسینیہ، مدنی نگر چڑئی بھول، ضلع میوربھنج (تجوید کی بعض کتابیں پڑھی تھیں)
• مولانا شاہ عالم گورکھپوری، نائب ناظم کل ہند مجلسِ تحفظِ ختمِ نبوت (انھوں نے بھی مولانا سے مجالِ تحفظ ختم نبوت میں بھرپور استفادہ کیا ہے)
ان کے علاوہ بھی ان کے تلامذہ کی ایک کثیر تعداد ہے۔
تصانیف
تلاش بسیار کے بعد آپ کی ان سات تصانیف کا علم ہوسکا: (1) یادگارِ یادگیر [مطبوعہ: 1965ء]، (2) اسلامِ قادیانی، (3) مناظرۂ بھدرک، (4) قرآن قادیانی [جو قادیانی قرآن کے نام سے بھی معروف ہے، طبع اول: 24 فروری 1946ء، طبع ثانی: فروری 2020ء؛ جسے دوبارہ مولانا شاہ عالم گورکھپوری نے عالمی مجلس تحفظ ختم نبوت، پاکستان سے مولانا اللہ وسایا صاحب کے زیر نگرانی شائع ہونے والی کتاب محاسبۂ قادیانیت کے ساتھ بطور رسالہ شاملِ اشاعت کروایا۔] (5) اڈیہ زبان میں قادیانی کاہیں کی مسلمان ناہانتی؟ یعنی قادیانی کیوں مسلمان نہیں؟۔ غالباً یہ کتاب مولانا محمد منظور نعمانیؒ کی کتاب ”قادیانی کیوں مسلمان نہیں؟“ کا ترجمہ ہے، (6) مناظرۂ بھدرک، (7) ذرا غور کریں [یہ کتاب مولانا محمد اسماعیل کٹکی رحمہ اللّٰہ کی مختلف تحریروں پر مشتمل ہے، جو شاہ عالم گورکھپوری، نائب ناظم کل ہند مجلس تحفظ ختم نبوت، دار العلوم دیوبند کی ترتیب دی ہوئی ہے۔] ان کے علاوہ کسی تصنیف کا علم نہ ہو سکا۔
وفات
10 محرم 1426ھ کا دن گزار کر 11 محرم کے شروع ہونے کے بعد اور 20 فروری 2005ء کے ختم ہونے سے قبل مولانا مرحوم 91 یا 92 سال کی عمر میں انتقال کرگئے۔ (الداعی، نور عالم خلیل امینی، ربیع الاول–ربیع الثانی 1426ھ م اپریل–مئی 2005ء و ذکر رفتگاں از مفتی سید سلمان منصور پوری، ج: 2، ص: 16)
ان کی وفات پر دار العلوم دیوبند کی مجلس عاملہ کی میٹنگ (منعقدہ 18 جمادی الاخری 1426ھ بہ مطابق 25 جولائی 2005ء بہ روز پیر) میں افسوس کا اظہار کیا گیا تھا۔ ان کی وفات کے موقع پر دار العلوم دیوبند کی دار الحدیث تحتانی میں ایک دعائیہ نشست کا انعقاد کیا گیا تھا، جس میں سابق مہتمم دار العلوم دیوبند اور موصوف کے شریکِ درس مولانا مرغوب الرحمن بجنوری، نائب مہتمم قاری عثمان منصورپوری، نائب مہتمم مولانا عبد الخالق مدراسی اور دیگر اساتذہ و طلبۂ دار العلوم دیوبند نے شریک ہوکر اظہارِ افسوس کرتے ہوئے ان کے لیے ایصال ثواب کیا۔ (ماہنامہ دار العلوم، رجب، شعبان 1426ھ بہ مطابق ستمبر 2005ء، مضمون: دارالعلوم دیوبند میں مجلس عاملہ رابطہ مدارس اسلامیہ عربیہ کا اہم اجلاس)
جب تک اڈیشا میں صحیح العقیدہ لوگ رہیں گے تب تک لوگ مولانا موصوف و مرحوم کے احسان مند رہیں گے۔
اللّٰہ تعالٰی مولانا کی مغفرت فرما کر جنت الفردوس میں اعلی مقام عطا فرمائے اور بعد کے لوگوں میں بھی ان سا جذبۂ دینی حمیت پیدا فرمائے۔ آمین
مصادر و مراجع
(1) نازش، مولانا مطیع اللہ (2023ء). اڈیشا کے مجاہدین آزادی. مطبوعہ: اڈیشا اردو اکادمی سنسکروتی بھون، بی جے بی نگر، بھونیشور. صفحات: 263–266۔
(2) برقی قاسمی، مولانا مفتی سید نقیب الامین، "سیکریٹری رپورٹ بہ موقع اجلاس منتظمہ جمعیت علمائے اڈیشا (الف)"، اشاعت: جمادی الاولی 1443ھ بہ مطابق 25 دسمبر 2021ء، ناشر: جامعہ اسلامیہ مرکز العلوم، تبلیغ نگر، ڈاکخانہ کود، ضلع کٹک، صفحہ: 3۔
(3) نیولپوری، حفیظ اللہ، "مولوی سید برکت اللہ برکت"، اڑیسہ میں اردو (ایڈیشن: اکتوبر یا دسمبر 2001ء). ناشر: قومی کونسل برائے فروغ اردو زبان (نئی دہلی)، صفحہ: 223، 446۔
(4) علوی، کفیل احمد، (ایڈیشن: 28 صفر 1417ھ بہ مطابق 15 جولائی 1996ء)، "مناظر اسلام حضرت مولانا سید محمد اسماعیل صاحب کٹکی، رکن شوری سے مولانا انٹرویو" از مولانا سید علی اشرف کٹکی (استاذ حدیث جامعہ اسلامیہ مرکز العلوم سونگڑہ)، رسالہ: آئینہ دار العلوم دیوبند، جلد: 12، شمارہ: 1۔
(5) چنیوٹی، مولانا مشتاق احمد (ایڈیشن: 2008ء)، تحفظ خاتم نبوت کی صد سالہ تاریخ، ناشر: انٹرنیشنل ختم نبوت موومنٹ، پاکستان، صفحہ: 514۔
(6) امینی، مولانا نور عالم خلیل، (ربيع الاول – ربيع الثانی 1426ھ بہ مطابق اپریل تا جولائی 2005ء). "الشيخ السيد محمد إسماعيل الكتكي رحمه الله 1332–1426هـ = 1914–2005م، عربی مجلہ: الداعی، ناشر: دار العلوم دیوبند، ضلع سہارنپور، اتر پردیش، جلد: 29، شمارہ: 3 و 4۔
(7) منصور پوری، مفتی سید محمد سلمان (ایڈیشن: اپریل 2020ء)، "حضرت مولانا سید محمد اسماعیل صاحب کٹکی". ذکرِ رفتگاں، جلد: دوم، ناشر: المرکز العلمی للنشر و التحقیق، لال باغ، مرادآباد، صفحات: 16–17۔
(8) کٹکی، مولانا سید محمد اسماعیل (2005ء؛ پہلا ایڈیشن)، "قاطع قادیانیت مناظر اسلام سید محمد اسماعیل صاحب کٹکی امیر شریعت اڑیسہ"، نام کتاب: ذرا غور کریں، ناشر: مرکزی دفتر کل ہند مجلس تحفظ ختم نبوت، دارالعلوم دیوبند، صفحہ: 2–3۔
(9) ہردوئی، مولانا محمد طیب قاسمی (ایڈیشن: 2015ء). دارالعلوم ڈائری (لیل و نہار): فیضانِ شیخ الاسلام نمبر، ناشر: ادارہ پیغام محمود دیوبند۔
(10) حاصل کردہ ریکارڈ (تاریخِ منظوری برائے سپردگی: 30 ذی الحجہ 1445ھ بہ مطابق 19 جولائی 2023ء) از محافظ خانہ دار العلوم دیوبند۔
(11) علوی، مولانا کفیل احمد، (10 جنوری 1989ء). "مناظر اسلام سید محمد اسماعیل صاحب کٹکی، امیر شریعت اڑیسہ" آئینہ دار العلوم دیوبند، جلد: 4، شمارہ: 11، صفحہ: 6۔
(12) بیگ، عماد القراء جناب مرزا بسم اللہ (1970ء). "قاری مولانا محمد اسماعیل". تذکرہ قاریان ہند (جلد سوم)، ناشر: میر محمد کتب خانہ، آرام باغ (کراچی)، صفحہ:111۔
(13) کٹکی، مولانا سید عبد الحفیظ (8 جمادی الاولی 1425ھ بہ مطابق 27 جون 2004ء)، مجلس شوریٰ جامعہ رشیدیہ ریاض العلوم سونگڑہ، ناشر: شعبۂ نشر و اشاعت جامعہ رشیدیہ ریاض العلوم سونگڑہ، صفحات: 7، 12–18۔
(14) نقیب، سید خاور (جنوری 2008ء؛ پہلا ایڈیشن). "مولانا سید محمد اسماعیل"، نام کتاب: صریرِ خامہ، مطبع: بندنا پرنٹرز، کٹک، صفحہ: 121۔
(15) اسحاق، محمد قمر (1996ء)، ہندوستان کے اہم مدارس (جلد اول)، ناشر: انسٹی ٹیوٹ آف آبجیکٹیو اسٹڈیز، نئی دہلی، صفحہ: 313۔
(16) دہلوی، یونس؛ دہلوی، ادریس؛ دہلوی، الیاس، (اکتوبر 1974ء)، "میں نے آٹھ ہزار قادیانیوں کو مسلمان کیا از مولانا محمد اسماعیل"، رسالہ: اردو ڈائجسٹ ”شبستان“، ناشر: شمع (یونانی اینڈ آیورویدک) لیبارٹریز، لال کنوان، دہلی، جلد: 8، شمارہ: 10، صفحات: 13–14۔
(17) قاسمی، مفتی محمد عبید اللہ اسعدی (ذی الحجہ 1420ھ بہ مطابق مارچ 2000ء؛ پہلا ایڈیشن)، "أعضاء المجلس الإستشاري لدار العلوم". دار العلوم ديوبند: مدرسة فكرية توجيهية حركة إصلاحية دعوية، مؤسسة تعليمية تربوية (عربی)، ناشر: شیخ الہند اکیڈمی، دار العلوم دیوبند، صفحہ: 104۔
(18) بہاولپوری، مولانا اللہ وسایا (جنوری 2012ء)، "عرض مرتب"، "تاریخ مناظرہ یادگیر"، احتساب قادیانیت (چالیسویں جلد)، ناشر: عالمی مجلس تحفظ ختم نبوت، ملتان، پاکستان، صفحات: 4–7، 68۔
(19) کٹکی، مولانا سید محمد اسماعیل (2012ء؛ دوسرا ایڈیشن)، "عرض ناشر از قاری سید محمد عثمان منصور پوریؒ"، نام کتاب: ذرا غور کریں، کل ہند مجلس تحفظ ختم نبوت دار العلوم دیوبند، صفحات: 3–4۔
(20) علوی، مولانا کفیل احمد، (یکم تا 15 مارچ 2005ء)، "مناظر اسلام شیر کٹک قاطع مرزائیت حضرت مولانا سید محمد اسماعیل صاحب نور اللہ مرقدہ، امیر شریعت اڑیسہ: حالات و خدمات، تاثرات از مفتی ریاست علی رامپوری". پندرہ روزہ: آئینہ دار العلوم، جلد: 20، شمارہ: 15، ناشر: شیخ الہند اکیڈمی، دار العلوم دیوبند، صفحات: 11–13۔
(21) مبارک پوری، مولانا محمد عارف جمیل (2021ء؛ پہلا ایڈیشن)، موسوعة علماء ديوبند (عربی)، ناشر: شیخ الہند اکیڈمی دار العلوم دیوبند، صفحہ: 327۔
(22) ریویو آف وقف ایڈمنسٹریشن (1965–66ء)، ناشر: وقف سیکشن، وزارت قانون (محکمہ قانون سازی)، حکومت ہند، صفحہ: 16۔
(23) گورکھپوری، مولانا شاہ عالم، تفاسیر قرآن مجید اور مرزائی شبہات (جلد اول)، ایڈیشن: نومبر 2005؛ دوسرا ایڈیشن: نومبر 2022ء، ناشر: شاہی کتب خانہ، دیوبند، صفحہ: 23۔
(24) خلیلی قاسمی، مفتی محمد اللّٰہ، "قادیانیت کی ہندوستان واپسی اور دار العلوم دیوبند کی خدمات" – "اراکین مجلس شوریٰ دار العلوم دیوبند"، دار العلوم دیوبند کی جامع و مختصر تاریخ، (ایڈیشن: اکتوبر 2020ء)، ناشر: شیخ الہند اکیڈمی، دار العلوم دیوبند، صفحات: 322–323، 758۔
(25) بستوی، مولانا شوکت علی قاسمی، رابطۂ مدارس اسلامیہ عربیہ دار العلوم دیوبند کی تیرہ سالہ خدمات، سنہ اشاعت: مئی 2007ء، ناشر: دفتر کل ہند رابطۂ مدارس اسلامیہ عربیہ دار العلوم دیوبند، صفحات: 106–107۔
(26) نقیب، سید خاور، "متن کی بازیافت"، نام کتاب: بیاضِ رحمت، سنہ اشاعت: 2014ء، ناشر: ایجوکیشنل پبلشنگ ہاؤس، لال کنواں، دہلی، صفحہ:11۔
(27) بہاولپوری، مولانا اللہ وسایا (اپریل 2016ء؛ پہلا ایڈیشن)، "اسماعیل کٹکی، مولانا محمد"، نام کتاب: چمنستان ختم نبوت کے گلہائے رنگا رنگ (جلد دوم)، ناشر: عالمی مجلس تحفظ ختم نبوت، ملتان، پاکستان، صفحات: 645–647۔
(28) بہاولپوری، مولانا اللہ وسایا (مارچ 2022ء؛ پہلا ایڈیشن)، "قرآن قادیانی"، نام کتاب: محاسبۂ قادیانیت، ناشر: عالمی مجلس تحفظ ختم نبوت، ملتان، پاکستان، صفحات: 6–7۔
(29) قاسمی، مفتی ثناء الہدیٰ (جولائی 2017ء). یادوں کے چراغ (جلد دوم) ناشر: ارم پبلشنگ ہاؤس، دریاپور، پٹنہ، صفحات: 115–116۔
(30) قاسمی اعظمی، مولانا حبیب الرحمن، (رجب، شعبان 1426ھ بہ مطابق ستمبر 2005ء)، "دارالعلوم دیوبند میں مجلس عاملہ رابطہ مدارس اسلامیہ عربیہ کا اہم اجلاس"، ماہنامہ دار العلوم، ناشر: دار العلوم دیوبند، ضلع سہارنپور، اتر پردیش. جلد: 89، شمارہ: 9۔
(31) القادری، مولانا ارشد (اگست 2005ء؛ پہلا ایڈیشن)، "کٹک کے تاریخی مناظرے میں اعلیٰ حضرت کے لفظ پر بحث"، نام کتاب: تجلیاتِ رضا، ناشر: دار الکتاب، مٹیا محل، جامع مسجد، دہلی، صفحہ: 170۔
(32) دیوی، بَندیتا، Some Aspects of British Administration in Orissa [1912-1936]، سنہ اشاعت: 1992، ناشر: اکیڈمک فاؤنڈیشن، نئی دہلی، صفحہ: 14–15۔
(33) جامعہ اسلامیہ مرکز العلوم سونگڑہ کی مجلسِ شوریٰ (منعقدہ: یکم محرم الحرام 1444ھ بہ مطابق 31 جولائی 2022ء) میں پیش کی گئی ”آئینِ جامعہ اسلامیہ مرکز العلوم سونگڑہ“۔
وہ مضامین جن تک رسائی نہیں ہو پائی؛ مگر ان میں مولانا مرحوم پر مضامین ہیں اور بندے کے علم میں ہیں:
(1) ہفت روزہ الجمعیۃ کے 2009ء کے تین شماروں میں اڈیشا کے معروف صحافی مولانا مطیع اللّٰہ نازش کٹکی کے قسط وار تین مضامین شائع ہوئے تھے۔
(2) مولانا مطیع اللہ نازش کٹکی ہی کا ایک مضمون 2007ء کو اڈیشا کی جانب سے شائع کردہ چھٹی جماعت میں داخل نصاب کتاب ”دلکش اردو “ میں شائع کیا گیا تھا۔
(3) جناب عادل صدیقی (متوفی:2021ء) کا مضمون، جو یکم رمضان 1412ھ بہ مطابق 6 مارچ 1996ء کو روزنامہ الجمعیۃ کے پانچویں جلد اور دسویں شمارے کے صفحہ نمبر دو اور گیارہ میں شائع ہوا تھا۔
کوئی تبصرے نہیں:
ایک تبصرہ شائع کریں