مولانا مفتی اشتیاق احمد قاسمی دربھنگوی: مختصر سوانحی خاکہ
محمد روح الامین میوربھنجی
مولانا مفتی اشتیاق احمد قاسمی دربھنگوی سرزمینِ بہار کے ضلع دربھنگہ سے تعلق رکھتے ہیں۔ وہ ایک عالم دین و مفتی ہونے کے ساتھ ساتھ ایک بہترین نقاد، سوانح نگار، تذکرہ نویس، خاکہ نگار، مقالہ نگار اور مصنف بھی ہیں اور 1999ء سے کتب درس نظامی کی تدریسی خدمات انجام دے رہے ہیں، گریڈ کے لحاظ سے وسطی ب کے مدرس ہیں، عربی زبان اور بلاغت کے علاوہ ہدایہ ثانی، ترجمہ قرآن مجید اور حدیث کی کتاب الفیۃ الحدیث کا درس بھی دیتے ہیں۔ ذیل میں ان کا سوانحی خاکہ قارئین کے پیش خدمت ہے۔
ولادت
مولانا کی پیدائش؛ ان کے نانیہال جھمٹا ضلع سہرسہ بہار میں ہوئی۔ دستاویز کے مطابق تاریخ ولادت 7 جنوری 1978ء ہے؛ لیکن خاندان کی بزرگ خواتین کی صراحت کے مطابق مارچ سنہ 1974ء میں ان کی پیدائش ہوئی۔ والد صاحب کا نام انوار احمد اور گھرانہ شیخ صدیقی ہے۔ آبائی گاؤں جھگڑُوا، کرت پور بلاک، ضلع دربھنگہ، بہار ہے۔
تعلیم و تربیت
انھوں نے ابتدائی تعلیم؛ اپنے والدین کے پاس پھر جناب ماسٹر عالم گیر صاحب کے پاس مکتب میں جماعت بندی کے بغیر دینیات، اردو، ہندی اور ابتدائی فارسی (فارسی کی پہلی) کی تعلیم حاصل کی۔
پھر 1983ء تا 1986ء مدرسہ معارف العلوم جھگڑوا میں مولانا عمر فاروق شمسی، مولانا محمد طیب قاسمی اور ماسٹر شبیر احمد وغیرہ کے پاس فارسی کی دوسری، آمد نامہ، منہاج العربیہ اور سال کی قید و بند کے بغیر آزادانہ طور پر اسکول کی چھٹی جماعت تک کی کتابیں پڑھیں۔
پھر 1986ء تا 1988ء مدرسہ فلاح المسلمین، بکرم، پٹنہ میں مولانا محمد سہیل احمد قاسمی، مولانا غیاث الدین احمد قاسمی، مولانا اظہار عالم قاسمی، حافظ محمود، مولانا ابو اللیث اور مولانا عبد القدوس وغیرہ کے پاس؛ فارسی، ہدایۃ النحو کا کچھ حصہ اور بہار بورڈ کی تحتانیہ و سلطانیہ چہارم تک کی تعلیم حاصل کی۔
پھر 1989ء تا 1991ء مدرسہ قاسم العلوم، منگراواں، ضلع اعظم گڑھ (یو، پی) میں مفتی عبد القادر بستوی، مولانا سہیل احمد قاسمی مبارک پوری، مولانا قمر الزماں قاسمی مبارک پوری اور مولانا محمد عارف ولید پوری وغیرہ کے پاس؛ اول، دوم اور سوم عربی پڑھی اور الٰہ آباد بورڈ سے مولوی کا امتحان دیا۔
پھر 1992ء تا 1995ء مدرسہ ریاض العلوم، گورینی، ضلع جونپور (یو، پی) میں حضرت مولانا عبد الحلیم جونپوری، مولانا محمد ارشاد بھاگلپوری، مولانا محمد جمیل، مولانا عبد اللّٰہ بستوی، مولانا اکرام اللّٰہ، مولانا عبد العظیم ندوی، مولانا سعادت علی الٰہ آبادی اور مفتی محمد حنیف جیسے اساتذہ کے پاس؛ چہارم، پنجم، ششم (موقوف علیہ) تک کی تعلیم حاصل کی اور قاری محمد شمیم صاحب سے اوقات درس میں قراءتِ حفص اور خارج میں قراءت سبعہ کی شاطبیہ پڑھی اور سبعہ میں اجراء بھی کیا، نیز مولانا عبد الحلیم صاحب سے قصیدۂ بردہ اور ہدایت الاذکیاء پڑھی۔
تعلیم سے فراغت
1996ء میں دار العلوم دیوبند سے دورۂ حدیث سے سوم پوزیشن کے ساتھ فارغ ہوئے، 1997ء میں وہیں سے افتاء، 1998ء تا 1999ء میں دو سال تدریبِ افتاء کیا اور اسی دوران خارج اوقات میں مسلم فنڈ دیوبند، اندرا اکیڈمی دیوبند، پھر دار العلوم کے شعبۂ کمپیوٹر میں اولین طلبہ کے درمیان؛ اردو، عربی و انگریزی کی ٹائپ رائٹنگ بھی سیکھی۔
دار العلوم دیوبند میں ان کے اساتذہ
مولانا نے شیخ نصیر احمد خان بلند شہری سے صحیح بخاری جلد اول، شیخ عبد الحق اعظمی سے صحیح بخاری جلد ثانی، مولانا نعمت اللّٰہ اعظمی سے صحیح مسلم جلد اول و سنن ابی داؤد جلد ثانی، مولانا قمر الدین احمد گورکھپوری سے صحیح مسلم جلد ثانی و سنن ابی داؤد جلد اول، اپنے خاص مربی حضرت مفتی سعید احمد پالن پوری سے جامع ترمذی جلد اول و طحاوی شریف، مولانا سید محمد ارشد مدنی سے جامع ترمذی جلد ثانی، مولانا عبد الخالق مدراسی سے شمائلِ ترمذی اور مولانا ریاست علی ظفر بجنوری سے سنن ابن ماجہ پڑھی۔ اپنے پیر و مرشد مفتی محمود حسن گنگوہی سے بخاری شریف کتاب الایمان تبرکاً اور سنن نسائی مستقلاً پڑھی، اگلے سال شرح عقود رسم المفتی پڑھی اور ان کے پاس تمرین فتاویٰ بھی کی۔ نیز مولانا حبیب الرحمٰن قاسمی اعظمی سے موطا امام محمد، مولانا قاری عثمان منصور پوری سے موطا امام مالک، مفتی نظام الدین اعظمی سے قواعد الفقہ پڑھی۔ مفتی حبیب الرحمن خیر آبادی سے سراجی، الدر المختار (مقدمہ، کتاب الوقف) پڑھنے کے علاوہ تدریب فی الافتاء کے دونوں سال ان سے تمرین فتاویٰ بھی لی۔ مفتی ظفیر الدین احمد مفتاحی سے الدر المختار (کتاب النکاح، کتاب الطلاق) پڑھی، ان کے پاس افتاء کی تمرین کی اور ان سے فتویٰ نویسی کے اصول و ضوابط بھی سیکھے۔ اس کے علاوہ مفتی محمود حسن بلند شہری کے پاس باضابطہ فتویٰ نویسی کی تمرین کی اور موجودہ صدر مفتی و استاذ حدیث مظاہر علوم سہارنپور مفتی محمد طاہر قاسمی غازی آبادی سے الاشباہ و النظائر پڑھی۔
بیعت و ارشاد کا تعلق
افتاء ہی کے سال رسم المفتی کا نصاب مکمل ہونے کے بعد مولانا موصوف مفتی محمود حسن گنگوہی سے بیعت ہوئے تھے، پھر حضرت گنگوہی کی وفات کے بعد مولانا مفتی نظام الدین اعظمی سے مناسبت پاکر انھیں مناسبت کے بارے میں بتایا تو انھوں نے کہا کہ اپنے حالات لکھ کر بتایا کرو؛ مگر چند دنوں بعد ہی ان کا انتقال ہوگیا، پھر مولانا موصوف نے بیعت و ارشاد کا تعلق مولانا مفتی مظفر حسین اجراڑوی کے خلیفہ مفتی سعید احمد پالن پوری صاحب سے کر لیا اور حضرت پالن پوری کی وفات تک انھیں سے منسلک رہے۔ حضرت پالن پوری کے بعد خلیفۂ فقیہ الامت مفتی محمد طاہر قاسمی غازی آبادی صدر مفتی مظاہر علوم سہارنپور کی طرف رجوع کر لیا۔
دار العلوم دیوبند میں معین مدرسی
1999ء تا 2000ء دار العلوم دیوبند میں معین مدرس رہے اور اول دوم عربی کی ساری کتابیں یعنی قدوری و کافیہ بحث فعل و حرف تک کی کتابیں ان سے متعلق تھیں۔
دار العلوم حیدر آباد میں
انھوں نے 2000ء تا 2008ء دار العلوم حیدر آباد میں مدرس و نائب مفتی کی حیثیت سے خدمات انجام دیں، جس درمیان اعدادیہ سے ہفتم عربی تک مختصر المعانی، تفسیر جلالین، مشکوٰۃ المصابیح اور افتاء میں الاشباہ و النظائر، رسم المفتی اور سراجی جیسی کتابیں ان سے متعلق تھیں۔
دار العلوم دیوبند میں تقرر
1430ھ مطابق 2008ء میں دار العلوم دیوبند میں ان کا تقرر ہوا اور اس وقت سے اب (2023ء) تک اول عربی سے ششم عربی تک؛ مفتاح العربیہ، ہدایۃ النحو، نور الایضاح، مرقاۃ، قدوری، آسان منطق، کافیہ، شرح تہذیب، قطبی، القراءۃ الواضحۃ حصہ سوم، تعلیم المتعلم، نفحۃ العرب، مشکوٰۃ الآثار، الفیۃ الحدیث، ترجمۂ قرآن (شروع سے سورۃ الحجرات تک)، نور الانوار، ہدایہ اولین، قطبی، دروس البلاغہ، اصول الشاشی اور تسہیل الاصول، مختلف مراحل میں ان کے زیر درس رہی ہیں اور بعض کے اسباق اب بھی ان سے متعلق ہیں۔
قلمی سرگرمیاں
مولانا کی قلمی سرگرمیوں میں طرازی شرح اردو سراجی، خاصیاتِ فصولِ اکبری پر تحقیق و تعلیق، مختصر خاصیاتِ ابواب (اردو)، مولانا بستوی کا ذکر جمیل، زیب و زینت کے احکام، کلیاتِ کاشف کی ترتیب، مالا بد منہ کا اردو ترجمہ، مولانا سعید احمد اکبر آبادی کا ذکر جمیل اور تقریباً پانچ غیر مطبوعہ تصانیف بھی شامل ہیں۔ ان کی کتاب طرازی شرح اردو سراجی کا فارسی، پشتو اور بنگلہ ترجمہ میں بھی ترجمہ ہو چکا ہے۔ نیز سالوں سے وہ ترجمۂ قرآن پر کام کر رہے تھے جو اب زیر طباعت ہے، جس کی چند خصوصیات درج ذیل ہیں: (1) ترجمہ آسان ترین اور جدید اسلوب میں ہے، جسے ادنیٰ اردو پڑھنے والا طبقہ بھی سمجھ سکتا ہے، (2) قدیم ترجموں میں عربی و فارسی کے الفاظ مستعمل ہوتے تھے، ان سے احتراز کیا گیا ہے اور ان کی جگہ آسان ترین متبادل استعمال کیا گیا ہے، (3) اجنبی و علاقائی الفاظ کے استعمال سے گریز کیا گیا ہے، (4) اٹھارہ قابلِ اعتماد اردو ترجموں کو سامنے رکھ کر حرفاً حرفاً ان کا تقابل کر کے آسان ترین الفاظ منتخب کیے گئے ہیں؛ تاکہ ترجمہ اکابر مترجمین کے مطابق رہے یعنی اس طرح ترجمہ کیا گیا ہے کہ ترجمہ ان قدیم ترجموں کے دائرے سے آزاد نہ ہونے پائے، (5) ترجمہ قابل اعتماد آٹھ عربی تفاسیر سے مراجعت اور اطمینان کے بعد کیا گیا ہے۔
مقالات و مضامین
رونامہ منصف حیدرآباد، روزنامہ اعتماد حیدرآباد، ماہنامہ حسامی حیدرآباد، ماہنامہ دار العلوم دیوبند، ماہنامہ ترجمانِ دیوبند، آئینۂ دار العلوم دیوبند، فکر و تحریر کلکتہ، سہ ماہی بحث و نظر حیدرآباد، ہماری زبان انجمن ترقی اردو، روزنامہ سہارا انڈیا، المفتاح حیدرآباد، ماہنامہ حضرت عائشہ حیدرآباد، ماہنامہ السعید پرنام بٹ (تمل ناڈو) وغیرہ میں مولانا کے تین سو سے زائد مقالات و مضامین شائع ہو چکے ہیں۔
بعض مشہور و اہم مقالات کا ذکر:
مفتی اعظم مفتی عزیز الرحمن عثمانی - حیات و خدمات
ترانۂ دار العلوم دیوبند کا فنی، فکری اور ادبی مطالعہ
صحابۂ کرام کے سلسلہ میں علمائے دیوبند کا معتدل موقف
حضرت مولانا محمد عثمان معروفی اور فن تاریخ گوئی
کاتبین پیغمبر اعظم صلی اللّٰہ علیہ وسلم: ایک تعارف
تدوین قرآن مجید - ایک تحقیقی جائزہ
عربی تفسیروں کے اردو ترجمے- تعارف و تجزیہ
نیٹ ورک مارکیٹنگ - اقتصادی اور اسلامی نقطۂ نظر
حضرت مفتی کفیل الرحمن نشاط عثمانی کی غزلیہ شاعری - معاصر ادباء کی نظر میں
اسلام كا نظام سلام و مصافحہ
انقلابِ ماہیت - اسلامی نقطۂ نظر
مدارس میں زکوٰة کی فراہمی اور طریقۂ استعمال
تحقیقی کارنامے
آپ نے حیدرآباد کے زمانۂ تدریس ہی میں 2007ء میں مولانا آزاد نیشنل اردو یونیورسٹی (حیدرآباد) سے ایم اے (اردو) کیا، پھر اردو ہی میں 2008 تا 2009ء وہیں سے ایم فِل کیا۔ مقالۂ ایم فِل کا عنوان ”چند منتخب علمائے دیوبند کی شاعری کا تجزیاتی مطالعہ“ تھا، جو سابق مہتمم دار العلوم دیوبند حکیم الاسلام قاری محمد طیب صاحب، سابق مفتی دار العلوم دیوبند مولانا کفیل الرحمن نشاط عثمانی اور استاذ حدیث دار العلوم دیوبند مولانا ریاست علی ظفر بجنوری رحمہم اللّٰہ کی مطبوعہ شاعری کے تجزیاتی مطالعہ پر مشتمل تھا۔
2012ء میں ڈاکٹر شمس الہدیٰ دریابادی کے زیر نگرانی ”علمائے دیوبند کی سوانح عمریوں کا تنقیدی تجزیہ (آزادی سے قبل)“ کے عنوان سے پی ایچ ڈی کا مقالہ لکھنا شروع کیا، 2018ء میں جمع کروایا اور 20 فروری 2020ء میں مولانا آزاد نیشنل اردو یونیورسٹی سے سندِ ڈاکٹریٹ ان کے حوالے کی گئی۔ ایم فل اور پی ایچ ڈی کے لیے جمع کیے گئے ان کے یہ مقالے شائع ہو جائیں تو دو ضخیم کتابیں منظر عام پر آ جائیں۔
اللّٰہ تعالیٰ صحت و عافیت کے ساتھ مولانا موصوف کی عمر میں برکت عطا فرمائے اور امت مسلمہ کو ان سے خوب مستفید فرمائے آمین ثم آمین یارب العالمین
